Arbaeen : Fazail-e-Zakat (Urdu)

اسلامی نظام معیشت میں زکوۃ اور صدقہ و خیرات کے نظام کا اجراء ریڑھ کی ہڈی کی حیثیت رکھتا ہے، اس کے بغیر معاشی تعطل دور نہیں کیا جاسکتا۔ نظام صلوٰۃ وعبادات سے اسلامی معاشرہ روحانی برکات وثمرات سے متمتع و فیض یاب ہوتا ہے جبکہ نظام زکوۃ سے اس کی مادی ضروریات کی کفالت کی ضمانت میسر آتی ہے۔ قرآن حکیم میں بیاسی (۸۲) مقامات ایسے ہیں جہاں نماز اور زکوۃ کی فرضیت کا حکم یکجا وارد ہوا ہے کیونکہ افرادِ معاشرہ کے روحانی اور مادی تقاضوں کی تکمیل کے بعد ہی ایک حقیقی اسلامی فلاحی معاشرہ پنپ سکتا ہے، جس میں نیکیوں اور اچھائیوں کو فروغ ملے، برائیوں کا قلع قمع ہوا اور ہر طرف خوش حالی کا دور دورہ ہو۔ اگر زکوۃ کی ادائیگی اور تقسیم کا با قاعدہ شفاف نظام معاشرے میں فروغ پا جائے تو اس سے بے شمار برکتیں پیدا ہوتی ہیں اور اصحاب ثروت کا مال بجائے گھٹنے کے مسلسل بڑھتا ہے اور معاشرے سے غربت و افلاس کے خاتمہ کی راہ بھی ہموار ہوتی ہے۔