Tazim Awr Ibadat (Urdu)

ادب و احترام کی اعلیٰ شکل کو تعظیم کہا جاتا ہے ۔ اسلام از اوّل تا آخر ہے ہی ادب اور تعظیم کا نام تعظیم کے مختلف دائرے اور مختلف شکلیں ہیں، اولاد کیلئے ماں باپ کی تعظیم ، شاگرد کیلئے استاد کی تعظیم اور مرید کیلئے شیخ کی تعظیم بجالا نا ضروری ہے۔ لیکن یہ تعظیم ادب و احترام
کے معنوں میں ہوتی ہے۔ جہاں تک اُس تعظیم کا تعلق ہے جس کی انتہائی شکل کو عبادت کہا جاتا ہے اُس کی حق دار و سزاوار صرف اللہ تعالی
کی ذات ہے۔ کوئی بھی راسخ العقیدہ مسلمان اللہ تعالی کے سوا کسی اور کی تعظیم عبادت کی نیت سے ہرگز نہیں کرتا ۔

قرآن وحدیث کی رو سے تعظیم ایک شرعی حکم ہے ۔ اگر یہ صرف اور صرف اللہ تعالیٰ کا حق ہوتا تو کسی فرد کو دوسرے کی تعظیم کرنے کا مطلقا
حکم نہ دیا جاتا۔ لہذا تعظیم نہ صرف شرعی واجبات میں سے ہے بلکہ مطابقاً مطلوب و مقبول عمل ہے جو بالکل جائز اور صائب عمل ہے۔ لہذا تعظیم کے انتہائی درجوں میں تمیز کرنا اور فرق روا رکھنا لازمی ہے۔ اس لیے ہر تعظیم کو عبادت نہیں کہا جا سکتا ۔ انبیائے کرام ، صالحین عظام، والدین، شیوخ ، اساتذہ یا کسی اور معزز ہستی کی عزت و توقیر، اُن کا ادب و احترام، اُن کی فرماں برداری تعمیل ارشاد اور ان سے منسوب اشیاء کی حرمت و تکریم شرعاً جائز امر ہے جو قطعاً عبادت نہیں ۔ ایک وحدہ لاشریک ہستی کے لئے بجالائی جانے والی بلند ترین تعظیم ہی کو عبادت سے موسوم کیا جائے گا۔